ACTIVIDADES EXTRA/COMPLEM. EQUIPO DA LINGUA GALEGA, BIBLI SOLIDARIAS, MOCHILAS VIAXEIRAS

venres, 18 de xuño de 2021

Asociación "Powerful Animals"

 Despedimos este curso co nacemento dunha asociación que promove o coñecemento dos animais, o respecto e o bo trato.

Powerful Animals naceu no seo da biblioteca onde ten o seu propio lugar na sección de Bioloxía da parte de Secundaria e está aberta a todos os compañeiros. 

As súas fundadoras elaboraron un tríptico para darense a coñecer:







Non dubidedes en poñervos en contacto cos compañeiros de 1º e 2º de ESO que figuran no tríptico para formar parte deste interesante proxecto. Estarán encantados de recibirvos!!

NORABOA pola vosa iniciativa!!!








Suxestións de lectura para o verán

 




martes, 1 de xuño de 2021

Regueifando a Xela Arias

 Bo día!

Lembrades que na entrada anterior mencionabamos o traballo que parte do alumnado de 6º B de E. Primaria estaba a facer co CEIP Soutelo de Montes? 

Pois ben, é para nós unha grande alegría e satisfacción, poder dicirvos que xa remataron e que podedes desfrutar do seu traballo neste enlace, tamén clicando no apartado do EDLG na páxina web do CPI deAtios.

Non o perdades! Está xenial!!!

mércores, 26 de maio de 2021

Día das Letras

 A pasada semana celebramos o Día das Letras e os Maios. No noso centro sempre vencellamos a celebración dos Maios coa das Letras e os tres equipos (de biblioteca, o EDLD e o EACE) organizamos en conxunto actividades nas que participa todo o alumnado, de Infantil a Primaria.


Os alumnos de Infantil coñeceron o libro Flores do escritor, ilustrador e artista Hervé Tullet e despois realizaron as súas propias composicións. Leron o conto de Gianni Rodari Que fai falta? e gravaron un vídeo-conto que compartiron co resto do alumnado e que se pode ver en Atios TV. Tamén coñeceron a Xela Arias a través das obras accesibles para eles: Darío a diario e o conto dos Bolechas publicado con motivo das Letras e dedicado a Xela.

Os alumnos de Primaria, ademais de facer actividades relacionadas cos recursos colgados nos enlaces ao blog, tamén fixeron outras actividades: o grupo de 6º B está a traballar as Regueifas co colexio de “Soutelo de Montes” a través da ferramenta interactiva “Genially”, esas regueifas teñen como fío condutor a figura e obra de Xela Arias. Aínda están sen rematar completamente, pero axiña as poderedes ver.




O alumnado de 5º participa nestes días nun taller de poesía coa autora que se traballou tamén no Día do Libro en Secundaria, Ana Varela, neste obradoiro aprenden a facer poemas con distintos tipos de rima e verso, caligramas, elaboraron poemas entre todos...

Ademais, o mércores 12 de maio ás 12’00 h. un grupo de alumnos de 4º ESO participou no programa divulgativo da lingua na TVG Dígocho eu a través da plataforma Twitch. O evento tivo lugar na nosa biblioteca e a participación dos nosos alumnos, xunto con outros cinco centros, foi retransmitida en directo en todas as aulas do centro. O vídeo está dispoñible na canle en Twitch do programa.

Na biblioteca aínda podedes ver unha pequena exposición coas obras de Xela Arias.







sábado, 17 de abril de 2021

Día do Libro 2021

Este venres falará con nós a nosa homenaxeada este ano no Día do Libro:

Ana Varela Miño naceu en Narón, en 1978, e é licenciada en Tradución e Interpretación pola Universidade de Vigo. Na actualidade traballa como tradutora e intérprete da Administración de Xustiza no Tribunal Superior de Xustiza de Galicia. 

Traduciu ao galego textos de Edgar Allan Poe e contos de Virginia Woolf. Tamén verteu ao castelán poemas de Antía Otero. En 2017 gañou o Certame de Poesía Francisco Añón con "Asombrario", o seu primeiro libro, e en 2019 obtivo o VI Premio Gonzalo López Abente con "Onde nacen as hedras".

Este é o cartel que fixemos para conmemorar e anunciar a súa visita, clicando sobre el, poderedes ler unha entrevista moi interesante que concedeu ao xornal La Voz de Galicia en xullo de 2019.



sábado, 20 de febreiro de 2021

24 de febreiro Día de Rosalía

Celebramos o aniversario do nacemento de Rosalía de Castro o vindeiro mércores 24 de febreiro. En tan sinalada data, poñemos á vosa disposición unha pequena exposición na biblioteca na que poderedes atopar edicións consideradas históricas da obra de Rosalía (por seren anteriores a 1985) xunto con edicións actuais ilustradas moi fermosas.

Descubride os pequenos tesouros que acolle a nosa biblioteca!!




O Equipo de Dinamización da Lingua Galega preparou para todos vós unhas interesantísimas actividades no seu apartado da páxina web do CPI de Atios. Prodedes clica na foto de embaixo para acceder a elas.